बाराका विभिन्न स्थानबाट लाखौं मूल्य बराबरको अवैध सामान बरामद
सिमराः सशस्त्र प्रहरीले शनिबार बाराका विभिन्न स्थानबाट लाखौं मूल्य बराबरको अवैध सामान बरामद छ ।
जितपुर सुरक्षा वेसको मोबाइल टोलीले पथलैया–हेटौडा सडकखण्डस्थित अमलेखगञ्जमा गाडी चेकजाँच गर्ने क्रममा करिब दुई लाख ६७ हजार रुपैयाँ बराबरको कपडा र किराना सामग्री बरामद गरेको सशस्त्र प्रहरीले जनाएको छ ।
यसैगरी सिम्रौनगढ नगरपालिका ३ झरोखर सीमा क्षेत्रबाट सीमा सुरक्षा गुल्म पिपरपातीको टोलीले मोटरसाइकलसहित करिब दुई लाख रुपैयाँ बराबरको किराना सामग्री बरामद गरेको छ ।
यसैगरी बीओपी कबैगोठले सुवर्णपुर गाउँपालिका ३ सन्तगञ्ज सीमा इलाकाबाट करिब ४० हजार रुपैयाँ बराबरको मोटर पाट्र्स बरामद गरेको जनाएको छ ।
उक्त बरामद गरिएका सबै सामान आवश्यक कानुनी कारबाहीका लागि वीरगन्ज भन्सार कार्यालयमा बुझाइएको बल नं १२ गण बाराका गणपति एवम् प्रहरी उपरीक्षक (एसपी) खुमबहादुर केसीले जानकारी दिए ।
एसपी केसीले बारामा रहेका मातहतका सम्पूर्ण युनिट इन्चार्जलाई सिमानाकामा विशेष निगरानी र कडा चेकजाँच गर्न निर्देशन दिएको जनाएका छन् ।
