सिमरामा मोटरसाईकल दुर्घटना हुँदा एक जनाको मृत्यु, दुई घाईते
सिमराः सिमरामा आइतबार दिउँसो मोटरसाईकल दुर्घटना हुँदा एक जनाको मृत्यु भएको छ भने दुई जना गम्भीर घाइते भएका छन् । मृत्यु हुनेमा सप्तरीको बसवलपुर नगरपालिका ७ का २८ वर्षीय महेश पण्डित रहेका छन् ।
दुर्घटनामा रौतहट गुजरा गाउँपालिका ७ परसवाका २५ वर्षीय रोशन चौधरी र ३४ वर्षीय भुपेन्द्र चौधरी घाइते भएका छन्।
वीरगञ्ज–पथलैया सडकखण्डमा सिमराबाट पथलैयातर्फ जाँदै गरेको बा ९० प ६७९४ नम्बरको मोटरसाइकल र विपरीत दिशाबाट आउँदै गरेको बा.प्र. ०६–००३ प १७५३ नम्बरको मोटरसाइकल एक आपसमा ठोक्किँदा दुर्घटना भएको इलाका प्रहरी कार्यालय सिमराले जनाएको छ ।
दुर्घटनामा बा ९० प ६७९४ नम्बरको मोटरसाइकल चालक रोशनको टाउको र दुवै खुट्टामा चोट लागेको छ । उनको उपचार प्रादेशिक अस्पताल कलैयामा भइरहेको छ ।
रोशनसंगै मोटरसाइकलमा सवार रहेका भुपेन्द्र चौधरीको दाहिने हात र बायाँ खुट्टामा चोट लागेको छ । उनको एलएस न्युरो अस्पताल, परवानिपुरमा उपचार भइरहेको प्रहरीले जनाएको छ ।
यसैगरी बा.प्र. ०६–००३ प १७५३ नम्बरको मोटरसाइकल चालक महेशको टाउको र खुट्टामा गम्भीर चोट लागेको थियो । एलएस न्युरो अस्पतालमा उपचारकै क्रममा उनको मृत्यु भएको हो ।
घटनाबारे थप अनुसन्धान भईरहेको प्रहरीले जनाएको छ ।
