रौतहटमा बेपत्ता भएको बालकको शव इनारमा फेला

रौतहटः रौतहटको गुजरा नगरपालिका ९ सिमराभवानिपुरबाट हराएका ३ वर्षीय बालक आइतबार मृत अवस्थामा फेला परेका छन् ।
शनिबार घरबाट बाहिर निस्केका स्थानीय विजय रामका छोरा आर्यन राम गुजरा ८ स्थित एक इनारमा मृत अवस्थामा फेला परेका हुन् ।
इलाका प्रहरी कार्यालय चन्द्रनिगाहपुरका अनुसार बालक घर फर्केर नआएपछि उनकी आमाले प्रहरीमा निवेदन दिएकी थिइन् ।प्रहरी निरीक्षक रुपेश कुमार झाको नेतृत्वमा खटिएको प्रहरी टोलीले चौकी सिमराभवानिपुर, र स्थानीय बासिन्दाको सहयोगमा खोजी कार्य सुरु गरिएको थियो ।
खोजतलासका क्रममा आर्यन रामको शव उनको घरबाट करिब ७ सय मिटर पश्चिमतर्फ रहेको एक इनारमा फेला परेको इलाका प्रहरी कार्यालय चन्द्रनिगाहपुरकी प्रमुख प्रहरी नायब उपरीक्षक (डीएसपी) रूपा लाबुङले जानकारी दिईन् ।
मृत बालकको शवलाई पोष्टमार्टमका लागि चन्द्रनिगाहपुरस्थित सरकारी अस्पतालमा राखिएको छ । घटनाबारे आवश्यक अनुसन्धान भइरहेको प्रहरीले जनाएको छ ।