रौतहट प्रहरीद्वारा २१ जना फरार प्रतिवादी एकै दिन पक्राउ
रौतहटः जिल्ला प्रहरी कार्यालय रौतहट तथा मातहतका युनिटहरूले फरार प्रतिवादी पक्राउ गर्ने विशेष अभियान अन्तर्गत एकै दिन २१ जना फरार प्रतिवादीहरूलाई पक्राउ गरेको छ ।
जिल्ला अदालत रौतहटबाट चेक अनादर, किर्ते नागरिकता र सवारी अंगभंग लगायतका विभिन्न मुद्दामा दोषी ठहर भई दण्ड जरिवाना तोकिएपछि लामो समयदेखि लुकिछिपी बस्दै आएका उनीहरूलाई प्रहरीले शुक्रवार जिल्लाका विभिन्न स्थानबाट नियन्त्रणमा लिएको हो ।
पक्राउ पर्नेहरूमा चेक अनादर मुद्दाका देवेन्द्र राजत बरै, राजकिशोर साह, सुशील पटेल, रामनाथ सहनी, रोकेश पटेल, दिपेन्द्र प्रसाद पटेल, रामबाबु प्रसाद पटेल र शिवनाथ प्रसाद जयसवाल, धर्मेन्द्र कुमार दास, कमेश्वर प्रसाद महतो, अमामुलदिन, बिजेश पटेल, मनोज कुमार राजत, पुनित प्रसाद यादव, जयराम मुखिया, विन्देश्वर प्रसाद पटेल र कृष्ण लामा रहेका जिल्ला प्रहरी प्रवक्ता डिएसपी वसन्त गौतमले जानकारी दिए ।
यसैगरी नागरिकता र किर्ते मुद्दाका रुपेश राय, प्रमुनन्दन प्रसाद यादव र रंजिता कुमारी यादव तथा सवारी अंगभंग मुद्दाका प्रमोद कुमार चौधरीलाई पनि प्रहरीले नियन्त्रणमा लिएको छ ।
जिल्ला प्रहरी कार्यालय रौतहटद्वारा जारी सूचना अनुसार कैद भुक्तान र फैसला कार्यान्वयनका लागि पक्राउ परेका २१ जना प्रतिवादीहरूलाई आवश्यक कारबाहीका लागि जिल्ला अदालत गौरमा उपस्थित गराइएको छ ।
