विभेदपूर्ण लिङ्ग छनोट गरी गर्भपतन गराउने बिरुद्ध अभिमुखिकरण कार्यक्रम सम्पन्न
बाराः जनस्वास्थ्य कार्यालय बारा ,कलैयाको आयोजनामा विभेदपूर्ण लिङ्ग छनोट गरी गर्भपतन गराउने बिरुद्ध एक दिने प्रचारप्रसार तथा अभिमुखिकरण कार्यक्रम सम्पन्न भएको छ । बाराको जीतपुरमा भएको कार्यक्रमको समन्वय जीतपुरसिमरा उपमहानगरपालिकाको जनस्वास्थ्य प्रबद्र्धन शाखाले गरेको थियो ।
कार्यक्रममा उपमहानगरपालिकाको जनस्वास्थ्य प्रबद्र्धन शाखा प्रमुख रबि भाष्करले गर्भवती महिलामध्ये अधिकाँशले गर्भावस्थामा अल्ट्रासाउन्ड गराउने र लिङ्ग पहिचान गरी छोरी भए गर्भपतन गर्ने अपराध नरोकिएको बताए ।
महिलाको चाहनाभन्दा पनि पुरुष प्रधान समाज, पितृसतात्मक सोच, अंश र वंशका लागि छोरा नै चाहिने गलत मानसिकताको परिणाम यस्तो हुन गएको जनस्वास्थ्य शाखा प्रमुख भाष्करले जानकारी दिनुभयो ।
कार्यक्रममा बिभिन्न अध्ययन तथा गणनाले महिलाको भन्दा पुरुषको जनसङ्ख्या बढिरहेको तथ्याङ्क प्रस्तुत गरेका थिए ।
कानून भएर पनि यस्तो अपराध गर्ने वा गराउनेलाई पहिचान गरी कारबाही गर्न नसकिएको सहभागीहरुले गुनासो गरेका थिए । बिभिन्न आधुनिक प्रबिधिले झन लिङ्गको पहिचान गरेर छोरा भए जन्म दिने र छोरी भएमा भ्रुणहत्या गर्ने अपराध बढेको उनीहरुको भनाई छ ।
लिङ्ग पहिचान गरी गर्भपतन गर्ने वा गराउनेलाई एक वर्षसम्म कैद र रु १० हजार जरिवाना देखि ५ बर्ष सम्म कैद र ५० हजार रुपैया सम्मको जरिवानाको सजायको व्यवस्था कानुनमा रहेको छ ।
वैवाहिक संस्कार र सामाजिक परम्परामा परिवर्तन नल्याई छोराछोरी समान हुन भनेर बताईरहँदा पनि ब्यवहारमा समानता नआएको जनस्वास्थ्य प्रबद्र्धन शाखा प्रमुख भाष्करले बताए । कार्यक्रमको सहजीकरण स्वास्थ्य कार्यालय बाराका अधिकृत भागिरथ चौधरीले गरेका थिए ।
