धनुषामा अन्तरजातीय विवाह गरेकी युवती मृत फेला, श्रीमान् प्रहरी नियन्त्रणमा
धनुषाः धनुषाको गणेशमान चारनाथ नगरपालिका ४ मा एक २५ वर्षीया युवती शङ्कास्पद अवस्थामा मृत फेला परेकी छन् । पाँच वर्षअघि मुकेश धनखोटी यादवसँग प्रेम विवाह गरेकी विभाकुमारी महतो मङ्गलबार दिउँसो आफ्नै घरमा झुन्डिएको अवस्थामा मृत फेला परेकी हुन् ।
मृतकका दाजु मनिषकुमार महतोका अनुसार विवाह भएको लामो समयसम्म सन्तान नभएको निहुँमा विभामाथि घरपरिवारबाटै शारीरिक तथा मानसिक यातना दिइँदै आएको थियो । घटनापछि मृतकको शरीरमा नीलडाम देखिएकाले यो आत्महत्या नभई हत्या भएको दाबी माइती पक्षले गरेको छ ।
सोही दाबी र माइती पक्षले दिएको जाहेरीका आधारमा प्रहरीले श्रीमान् मुकेशलाई आत्महत्या दुरुत्साहनको आरोपमा नियन्त्रणमा लिएको छ ।
जिल्ला प्रहरी कार्यालय धनुषाका डीएसपी गणेश बमले घटनाबारे थप अनुसन्धान भइरहेको र पोस्टमार्टम रिपोर्टपछि अन्य तथ्य खुल्ने जानकारी दिएका छन् ।
