हसिना खातुन मृत्यु प्रकरणः न्यायको माग गर्दै जिल्ला प्रहरी कार्यालय अगाडि प्रदर्शन
जनकपुरधामः जनकपुरधाम उपमहानगरपालिका २५ की हसिना खातुनको शंकास्पद मृत्यु भएको घटनालाई लिएर पीडित पक्षले न्यायको माग गर्दै प्रदर्शन गरेका छन् ।
खातुनको माइती पक्ष, आफन्त र अधिकारकर्मीहरूले जिल्ला प्रहरी कार्यालय धनुषाको मूल ढोका अगाडि भेला भई दोषीलाई तत्काल पक्राउ गरी कडा कानुनी कारबाही गर्न माग गरेका हुन् । प्रदर्शनकारीहरूले ‘हत्यारालाई कारबाही गर’ र ‘पीडितलाई न्याय दे’ जस्ता नारा लगाउँदै घटनाको निष्पक्ष छानबिनका लागि दबाब दिएका छन् ।
गत फागुन १३ गते आफ्नै घरमा मृत फेला परेकी हसिनाको मृत्युलाई उनका घर पक्षले आत्महत्या बताए पनि माइती पक्षले भने यसलाई योजनाबद्ध हत्या भएको दाबी गरेका छन् ।
दाइजोको विषयलाई लिएर घरमा पटक–पटक विवाद हुने गरेको र सोही तनावका कारण उनको ज्यान लिइएको माइती पक्षको आरोप छ । प्रदर्शनमा सहभागी मृतककी भाउजु लिखत प्रविणले घटनाको प्रकृति र पृष्ठभूमिबारे गम्भीर आरोप लगाएकी छिन् ।
प्रविणका अनुसार हसिनाको हत्यामा उनका श्रीमान शहनवाज शेष (मुन्ना), सासु र ननदको प्रत्यक्ष संलग्नता रहेको छ । दुई वर्षअघि आठ लाख रुपैयाँ दाइजो दिएर धुमधामसँग विवाह गरिए पनि थप रकमका लागि हसिनालाई निरन्तर मानसिक र शारीरिक यातना दिने गरिएको उनले बताइन् ।
साथै श्रीमानको अन्य महिलासँगको सम्बन्धका कारण उनले दोस्रो विवाह गर्ने योजना बनाएको र त्यसकै बाधक ठानेर हसिनाको हत्या गरिएको दाबी प्रविणले गरेकी छिन् ।
यस घटनालाई धनुषा प्रहरीले गम्भीरतापूर्वक लिँदै अनुसन्धान सुरु गरेको छ । प्रहरीले हाल मृतकका श्रीमान शहनवाज शेषलाई नियन्त्रणमा लिएर सोधपुछ गरिरहेको छ ।
संकलित प्रमाण, विभिन्न पक्षको बयान र पोस्टमार्टम रिपोर्टको विस्तृत अध्ययनपछि मात्र घटनाको वास्तविक तथ्य बाहिर ल्याउने प्रहरीले जनाएको छ ।
