बारामा रुखले थिचेर एक जनाको मृत्यु
सिमरा: बाराको सुवर्ण गाउँपालिकामा रुख काट्ने क्रममा थिच्चिएर मंगलबार एक जनाको घटनास्थलमै मृत्यु भएको छ । मृत्यु हुनेमा सुवर्ण गाउँपालिका-१ रामटोल बस्ने ५५ वर्षीय जोखन महरा रहेका छन् ।
सुवर्ण गाउँपालिका–२ सनफुलवामा रुख काट्ने र टुक्राउने क्रममा सो दुर्घटना भएको हो । बाराका प्रहरी प्रवक्ता एवम् प्रहरी नायब उपरीक्षक मिनबहादुर घलेका अनुसार सुवर्ण गाउँपालिका-३ संतगजका शिवधारी पण्डितको जग्गामा रहेको पकडको रुख काट्ने क्रममा महरालाई अर्को रुखले थिचेको थियो ।
उक्त पकडको रुख सुवर्ण गाउँपालिका-७ का बाबुलाल यादवले खरिद गरेका थिए र सोही रुखलाई टुक्राउने क्रममा महरा दुर्घटनामा परेका हुन् । घटनास्थलमै ज्यान गुमाएका महराको शवलाई शल्यपरीक्षणका लागि कलैयास्थित प्रादेशिक अस्पतालमा पठाइएको प्रहरी प्रवक्ता घलेले जानकारी दिएका छन् ।
