भारतको कीट विश्वविद्यालयमा वीरगन्ज निवासी प्रिसा साह मृत अवस्थामा फेला
सिमराः भारतको ओडिसा राज्यस्थित भुवनेश्वरमा रहेको कलिङ्गा इन्स्टिच्युट अफ इन्डस्ट्रियल टेक्नोलोजी (KIIT) विश्वविद्यालयमा बिहीवार साँझ एक नेपाली छात्रा मृत भेटिएकी छन् ।
कीट विश्वविद्यालयमा बीटेक सिएसईको पहिलो वर्षमा अध्ययनरत छात्रा १९ वर्षीय प्रिशा साह विश्वविद्यालयकै ‘क्यु सि ४’ छात्रवासको कोठामा झुन्डिएको अवस्थामा मृत भेटिएकी हुन् । साह वीरगन्ज महानगरपालिका वडा नम्बर १५ भिस्वा बस्ने श्याम साहकी छोरी हुन् ।
कलेज प्रशासनले बिहीवार राति ९ बजेतिर घरमा फोन गरेर प्रिशाको मृत्यु बारे जानकारी दिएको मृतक प्रिशाका भाइ गौरव साहले बताए । गौरबका अनुसार बिहीबार दिउँसो ३ बजेतिर कलेजबाट प्रिशाले घरमा फोन गरेर आफू मे १८ तारिखमा विदामा घर आउने जानकारी गराएकी थिइन् । प्रिशा एक वर्षअघि बिटेक अध्ययनका लागि कीट विश्वविद्यालय गएकी थिईन् ।
विश्वविद्यालयमा बीटेक पहिलो वर्षमा अध्ययनरत छात्रा प्रिशा साह झुन्डिएर मृत अवस्थामा भेटिएको भारतको दिल्लीस्थित नेपाली दूतावासले पनि पुष्टि गरेको छ । कलेज प्रशासनले घटनाबारे नेपालमा रहेका मृतकका परिवारजनलाई खबर गरिसकेको र उनीहरू कलेजमा आएपछि मात्रै शवको पोष्टमार्टम गरिने जानकारी गराएको नेपाली दूतावासले जनाएको छ ।
यसअघि गत फागुनमा पनि नेपालको बुटवलकी छात्रा २० वर्षीया प्रकृति लम्सालको त्यही विश्वविद्यालयमा झुन्डिएको अवस्थामा शव भेटिएको थियो ।
यता प्रिसा साह मृत फेला परेको घटनाबारे प्रहरी आयुक्त र राजस्व डिभिजनल कमिश्नर लगायतका वरिष्ठ अधिकारीहरू घटनाको कारणबारे सोधपुछ र अनुसन्धानमा जुटेको ओडिसाको मौलिक तथा जनसम्पर्क विभागले एक विज्ञप्तिमार्फत जानकारी दिएको हो ।
