वीरगन्जमा आयोजित सडक सुरक्षा सप्ताह सम्पन्न, ट्राफिक सचेतनालाई निरन्तरता दिने प्रतिबद्धता
वीरगन्जः सामुदायिक प्रहरी साझेदारी कार्यक्रमअन्तर्गत ‘सुरक्षित सडक, सुरक्षित समाज’ भन्ने नाराका साथ वीरगन्जमा आयोजित सडक सुरक्षा सप्ताह बुधवार सम्पन्न भएको छ ।
मधेश प्रदेश प्रहरी कार्यालय जनकपुरधाम, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय पथलैया, जिल्ला प्रहरी कार्यालय पर्सा र जिल्ला ट्राफिक प्रहरी कार्यालय वीरगंजको समन्वयमा सप्ताह जेठ २२ गतेदेखि आयोजना गरिएको थिया ।
टाउनहलमा आयोजित समापन समारोहमा वीरगन्ज महानगरपालिकाका नगर प्रमुख राजेशमान सिंहले ट्राफिक व्यवस्थापन सुधारका लागि सबै सरोकारवालाबीच आपसी समन्वय आवश्यक रहेको बताए । सिंहले त्यसका लागि महानगरपालिका समन्वय गर्न तयार रहेको बताए ।
पर्साका प्रहरी प्रमुख गौतम मिश्रले सडकमा परिचालन हुने ट्राफिक प्रहरीलाई स्रोत–साधनसहित बलियो बनाउँदै लगिनुपर्ने बताए ।
कार्यक्रममा नगर उपप्रमुख ईम्तियाज आलम, नेपाली सेना, सशस्त्र प्रहरी, उद्योग वाणिज्य संघका प्रतिनिधि, विद्यार्थीलगायत सयौंको उपस्थिति रहेको थियो ।
