वीरगन्जको नारायणी अस्पतालमा स्तन क्यान्सर परीक्षण र बाँझोपन उपचार सेवा शुरु
सिमराः वीरगन्जस्थित संघीय नारायणी अस्पतालमा स्तन क्यान्सर परीक्षण र बाँझोपनको उपचार सेवा शुरु भएको छ । स्वास्थ्य तथा जनसंख्या मन्त्री प्रदीप मन्त्री पौडेलले एक कार्यक्रमबीच दुवै सेवाको औपचारिक शुभारम्भ गरेका छन् ।
महिलामा बढ्दो क्यान्सरको जोखिमलाई मध्यनजर गर्दै मधेश प्रदेशका महिलालाई लक्षित गरी मेमोग्राम सेवा (स्तन क्यान्सर परीक्षण) सुरु गरिएको हो । यसैगरी निःसन्तान दम्पत्तीलक्षित बाँझोपनको उपचारसमेत अस्पतालमा शुरु भएको छ ।
नसर्ने रोगहरू विरुद्ध पूर्वसावधानीका उपायहरूमा जोड दिँदै मन्त्री पौडेलले मधेश प्रदेशका महिलालाई सुपथ मूल्यमा समयमै स्वास्थ्य परीक्षण उपलब्ध गराउने व्यवस्था मिलाइएको जानकारी दिए ।
मन्त्रालयको सहयोगमा अस्पतालमा यसअघि नै पाठेघरको मुखको क्यान्सर परीक्षण तथा उपचार सञ्चालनमा आइसकेको छ । मन्त्री पौडेलकै सक्रियतामा अस्पतालमा लामो समयदेखि सञ्चालन हुन नसकेको क्याथ ल्याब सेवा सञ्चालनमा ल्याउने तयारी भईरहेको छ ।
नयाँ बजेटमा मधेश प्रदेशमा लक्षित मृगौला उपचार केन्द्रका लागि समेत व्यवस्था गरिएको उल्लेख गर्दै मन्त्री पौडेलले अन्य आवश्यक सेवा विस्तारमा प्राथमिकताका साथ काम गरिने बताए ।
