रसुवागढीमा बेपत्ता प्रहरी जवान ठाकुरको कुशको शव बनाएर अन्त्येष्टी
सिमराः नेपाल–चीन सिमानास्थित रसुवागढीमा गत असार २४ गते बाढीमा बेपत्ता भएका प्रहरी जवान मुन्ना ठाकुरको अवस्था अज्ञात बनेपछि परिवारले शुक्रबार कुशको शव बनाएर अन्त्येष्टी गरेका छन् । घटना भएको एक महिनासम्म पनि शव नभेटिएपछि उनका परिवारले ३२औं दिनमा कुशको शव बनाएर अन्त्येटी गरेका हुन् ।
बाराको फेटा गाँउपालिका १ घर भएका २४ वर्षीय प्रहरी जवान ठाकुर रसुवाको नेपाल–चीन सीमा नाकामा रहेको ल्हेन्दे खोलामा आएको बाढीमा बेपत्ता भएका थिए । बाढीले नेपालमा सीमा क्षेत्रमा ठूलो जनधनको क्षति भएको थियो ।
सो बाढीमा बेपत्ता भएका ठाकुर जिल्ला प्रहरी कार्यालय पर्सा दरबन्दी भई ईलाका प्रहरी कार्यालय टिमुरेमा कार्यरत थिए । उनि बाढी प्रभावित क्षेत्रमा उद्धारका लागि खटिएका थिए । सोही बेला बेपत्ता भएका ठाकुरको अवस्था त्यसयता अज्ञात छ ।
बाढीमा परी ठाकुरसहित ईलाका प्रहरी कार्यालय टिमुरेमा कार्यरत प्रहरी सहायक निरीक्षक लालबहादुर श्रेष्ठ र प्रहरी जवान लोकेन्द्र बोहोरा गरी २० जना बेपत्ता भएका थिए । बेपत्तामध्ये प्रहरी सहायक निरीक्षक श्रेष्ठको शव असार २५ गते चितवनको त्रिशूली नदी किनारमा फेला परेको थियो । सो बाढीमा १९ जनाको अवस्था अझै अज्ञात छ ।
बेपत्ता हुनेमा ६ जना चिनियाँ नागरिक, ११ जना स्थानीय र दुई प्रहरी जवान छन् । शव भेटिने सम्भावना नदेखेपछि परिवारले धार्मिक विधिअनुसार ठाकुरको अन्तिम संस्कार गरेका हुन् । कुशको शव बनाएर गरिएको अन्तिम बिदाईका क्रममा ठाकुरकी पत्नी गुञ्जासहित परिवारका सदस्य र आफन्त मुर्छित बनेका थिए । प्रहरी जवान ठाकुरको एक छोरा छन् ।
