फेसबुकको वेब भर्सनमा प्राविधिक समस्या: देखियो ‘अकाउन्ट टेम्पोरेरिलि अनएभलेबल’ को सूचना
सिमराः लोकप्रिय सामाजिक सञ्जाल प्लेटफर्म फेसबुकको वेब भर्सनमा अचानक प्राविधिक समस्या देखिएको छ। आइतबार दिउँसोदेखि प्रयोगकर्ताहरूले वेब ब्राउजरमार्फत आफ्नो फेसबुक खाता लगइन गर्दा वा चलाउँदा विभिन्न समस्याहरूको सामना गरिरहेका छन् ।
वेबसाइट खोल्दा प्रयोगकर्ताहरूको स्क्रिनमा ‘अकाउन्ट टेम्पोरेरिलि अनएभलेबल’ भन्ने सूचना देखाइएको छ। उक्त सूचनामा साइटमा प्राविधिक समस्या आएका कारण सेवा अवरुद्ध भएको र केही मिनेटमा समस्या समाधान हुने उल्लेख गरिएको छ ।
ब्राउजर वा डेस्कटप भर्सनमा यो समस्या देखिए तापनि फेसबुकको मोबाइल एप्लिकेसनमा भने कुनै समस्या नदेखिएको प्रयोगकर्ताहरूले बताएका छन् । मोबाइल प्रयोगकर्ताहरूले सहजै आफ्नो फिड हेर्न र म्यासेज पठाउन सकिरहेका छन् ।
फेसबुकको मातृ कम्पनी मेटाले यस प्राविधिक गडबडीबारे अहिलेसम्म कुनै आधिकारिक जानकारी सार्वजनिक गरेको छैन। तर स्क्रिनमा देखिएको सूचनाका आधारमा यो फेसबुकको आन्तरिक सर्भर वा प्राविधिक गडबडीका कारण भएको र यसलाई सुधार गर्ने प्रयास भइरहेको बुझ्न सकिन्छ।
धेरै प्रयोगकर्ताहरूले आफ्नो एकाउन्ट मात्र ब्लक वा ह्याक भएको आशंका गरे तापनि यो विश्वव्यापी रूपमै डेस्कटप भर्सनमा देखिएको साझा समस्या हो।
