रडले छेडिएर घाइते बालकको उपचारमा आर्थिक समस्या, अस्पतालबाट आमाको बिलौना
सिमराः बाराको सिमरा विमानस्थल अगाडीको सडकमा बनाइएको नालाको रडमा छेडिएर बिहीबार घाइते भएका आठ वर्षीय प्रितराज गिरी अझै होसमा आउन सकेका छैनन् । उनको परवानीपुरस्थित एलएस न्यूरो अस्पतालको आईसियूमा उपचार भईरहेको छ ।
अस्पतालमा रहेका परिवारका अनुसार चिकित्सकले बालकको अवस्थाबारे शनिबार जानकारी दिने बताएका छन् । रडले पेटमा छेडेर गम्भीर घाइते भएका बालकको शल्यक्रिया गरिएको छ । बालककी आमा उषादेवीले छोरा अझै होसमा नआएको र आफूहरुले समेत भेटन नपाएको बताएकी छिन् ।
जीतपुरसिमरा १ स्थित थानीमाई आधारभूत विद्यालयमा कक्षा ५ मा अध्ययनरत बालक घर नजिकै खेल्ने क्रममा लडेर नालामाथिको रडमा छेडिन पुगेका थिए । घटनालगत्तै उनलाई स्थानीयले अस्पताल लगेका हुन् ।
सिमरा विमानस्थलको मुख्य प्रवेशद्धारबाट उत्तरतर्फ जाने सडक छेउमा निर्माण भएको उक्त नालामा घटना भएको हो । नाला निर्माण भएको लामो समय वितिसक्दा पनि रड ठाडो अवस्थामा छोडिएको थियो भने नालालाई माथिबाट छोपिएको थिएन ।
रकम बुझाउन नसक्दा औषधी रोकियो
उपचारमा लाग्ने रकम जोहो गर्न नसक्दा बालकलाई आवश्यक पर्ने औषधी समेत रोकिएको छ । न्यूरो अस्पतालमा रहेको फार्मेसीले पैसा नबुझाएसम्म औषधी नदिने भन्दै रोकेको घाइते बालककी आमा उषाले बताईन् ।
बालकको उपचारमा अहिलेसम्म दुई लाख भन्दा बढी रकम लागेको छ । जसमध्ये उषाले सापटी खोजेर ४० हजार रकम बुझाएकी छिन् । उनले एक लाख ६० हजार अझै बुझाउन बाँकी छ । अस्पतालको फार्मेसीले औषधीका लागि ५० हजार बुझाउन भनेपछि उषालाई रकम जुटाउन समस्या परेको छ ।
‘औषधी दिने ठाँउमा ५० हजार मागिरहेको छ । म संग अहिले पैसा छैन’ उषाले भनिन् ‘पछि ऋण खोजेर तिर्छु अहिले औषधी दिनुस् भन्दा फार्मेसीले मानिरहेको छैन । म के गरु? ।’
होसमा नआएका कारण बालकलाई अझै केही दिन अस्पतालमा राखेर उपचार गर्नुपर्ने र गम्भीर चोटका कारण उनको उपचार खर्चिलो हुने देखिन्छ । तर सामान्य परिवारकी उषालाई भने उपचारमा आवश्यक रकम जोहो गर्न सजिलो देखिदैन् ।
उषाले सिमरास्थित एक उद्योगमा बुधबारदेखि ज्यालादारी गर्न सुरु गरेकी थिईन् । तीन सन्तानकी आमा उषा यसअघि सिमरामै रहेको एक टिभी पसलमा काम गर्थिन् । उनको श्रीमान रामजी गिरी रोजगारीको सिलसिलामा मलेसियामा छन् ।
सिमरास्थित पानीटंकी क्षेत्रमा ६ वर्षदेखि बस्दै आएकी उषा सोमबार मात्रै घटनास्थल नजिकको घरमा कोठा लिएर सरेकी थिईन् । पानीटंकीको कोठा छोडेर विमानस्थल नजिकको कोठामा सरेको चौथो दिनमै घटना भएको हो ।
