निकुञ्जमा मारिएका तितुङको परिवारलाई क्षतिपूर्ति उपलब्ध गराउन एमाले सचेतक बर्तौलाको माग
सिमराः नेकपा एमालेका प्रमुख सचेतक एवम् प्रतिनिधिसभा सदस्य महेश बर्तौलाले पर्सा राष्ट्रिय निकुञ्जमा नेपाली सेनाको गोली लागेर मृत्यु भएका सुकबहादुर तितुङको परिवारलाई क्षतिपूर्ति उपलब्ध गराउन माग गरेका छन् ।
प्रतिनिधि सभाको आइतबारको बैठकमा बोल्दै मकवानपुर २ बाट निर्वाचित सांसद बर्तौलाले मृतक तितुङको परिवारलाई क्षतिपूर्ति र घटनाको छानविन गर्दै दोषीमाथि कारवाहीको माग गरेका हुन् ।
बर्तौलाले सामान्य मानवीयता समेत नराखी छातीमा गोली हानेर तितुङको हत्या गरेको र गणतन्त्रमा नागरिकलाई दिनदहाडै हत्या गर्न नपाइने भन्दै सभामुखको ध्यानाकर्षण गराएका थिए ।
हेटौडा उपमहानगरपालिका १४ घर भएका तितुङको असार ७ गते निकुञ्ज क्षेत्रभित्र सेनाको गोली लागेर मृत्यु भएको थियो । हतियारसहित निकुञ्ज प्रवेश गरेको समूहसंग गस्तीमा रहेको सेनाको टोलीबीच मुठभेड हुँदा एकको मृत्यु भएको जानकारी निकुञ्जले गराएको थियो ।
