मधेशमा ३२० किलोमिटर कालोपत्रे सडक निर्माण हुँदै, प्रधानमन्त्री ओलीले आइतबार शिलान्यास गर्ने
सिमराः मधेश प्रदेश सरकारको भौतिक पूर्वाधार विकास मन्त्रालयमार्फत निर्माण हुने ‘एक निर्वाचन क्षेत्र, एक कालोपत्रे सडक’ योजनाको शिलान्यासको तयारी पूरा भएको छ । योजनाको शिालान्यास जेठ १८ गते आइतबार प्रधानमन्त्री केपी शर्मा ओलीले गर्ने कार्यक्रम रहेको छ ।
योजना अनुसार मधेश प्रदेशका ६४ वटै प्रदेशसभा निर्वाचन क्षेत्रमा पाँच–पाँच किलोमिटरका दरले कालोपत्रे सडक निर्माण गरिनेछ । मधेशमा ३२० किलोमिटर कालोपत्रे सडक निर्माण हुनेछ ।
उक्त योजनाको डिजिटल शिलान्यास जनकपुरधामस्थित महेन्द्रनारायण निधि सभागृहमा प्रधानमन्त्री ओलीले गर्ने कायक्रम तय भएको भौतिक पूर्वाधार मन्त्री सरोज यादवले जानकारी दिएका छन् । शिलान्यास कार्यक्रमलाई ऐतिहासिक र सन्देशमूलक बनाउने मन्त्रालयको तयारी रहेको मन्त्री यादवले बताए ।
‘यो मन्त्रालयको मात्रै होईन मधेश प्रदेशबासीको योजना हो । यो योजनाले जनतालाई प्रत्यक्ष लाभ पुर्याउने छ’ मन्त्री यादवले भने ‘त्यसैले पनि यसलाई सन्देशमुलक बनाउन जरुरी छ । यस्ता योजनालाई निरन्तरता दिनुपर्छ ।’
मन्त्री यादवका अनुसार सडक निर्माणबाट ग्रामीण क्षेत्र शहरी केन्द्रसँग जोडिने, कृषि उत्पादन बजारसम्म पुर्याउन र आपतकालीन सेवा सहज हुने अपेक्षा गरिएको छ । सडकले रोजगारी सिर्जना, आर्थिक गति, व्यापार, पर्यटन र स्थानीय उद्योगधन्दा प्रवद्र्धनमा समेत महत्वपूर्ण भूमिका खेल्ने विश्वास गरिएको मन्त्री यादवले बताए ।
