यसरी भएको थियो प्रसौनीमा पानी उद्योगका प्रवन्धकको हत्या..
सिमरा: बाराको प्रसौनी गाउँपालिका ६ स्थित किरण वेभरेज प्रालिका प्रवन्धक रामकिशोर सिंहको हत्या आरोपमा दुई जना पक्राउ परेका छन्। पक्राउ पर्नेमा वीरगन्ज महानगरपालिका २२ का २१ वर्षीय राजनकुमार राम र ३२ वर्षीय प्रमोद साह तुरहा रहेका छन्।
हत्या गरेर फरार रहेका उनीहरूलाई प्रहरीले घटना भएको १८ घण्टामै नियन्त्रणमा लिएको हो। भारतीय सीमा क्षेत्रबाट मंसिर १२ गते राति पक्राउ परेका उनीहरूलाई बारा जिल्ला अदालतबाट सात दिन हिरासतमा राख्ने अनुमति लिएपछि प्रहरीले आइतबार सार्वजनिक गरेको हो।
धारिलो हतियार प्रहार गरी हत्या
मंसिर ११ गते राति ५० वर्षीय सिंहलाई धारिलो हतियारले रेटेर हत्या गरिएको प्रहरीले जनाएको छ। हत्या गरेपछि उनीहरूले शवलाई उद्योगभन्दा करिब २५ मिटर उत्तरतर्फको झाडीमा फालेर फरार भएका थिए।
घटनास्थलको अनुसन्धानका क्रममा उद्योगमा चालकका रूपमा कार्यरत रामको संलग्नता देखिएपछि प्रहरीले उनलाई केन्द्रीत गरी अनुसन्धान अघि बढाएको थियो।
रामलाई उद्योगमा आचरण राम्रो नभएको कारण मंसिर १० गते कामबाट हटाइएको थियो भने मंसिर ११ गते काम गरेबापतको ज्याला दिइ पठाइएको थियो। उद्योगबाट उत्पादित पानी व्यक्तिगत नाफाका लागि बढी मूल्यमा बिक्री गर्दै आएको थाहा पाएपछि प्रवन्धक सिंहले रामलाई हटाएको प्रहरीले जनाएको छ।
पहिलेदेखि नै विवाद
सिंह र रामबीच अघिल्लो वर्षको मंसिर महिनामा पनि विवाद भएको थियो। विवादपछि उद्योग छाडेर गएका राम कार्तिक १ गतेदेखि पुनः चालकका रूपमा काममा फर्किएका थिए । प्रवन्धक र चालकबीचको सम्बन्ध त्यतिबेलादेखि नै राम्रो थिएन।
प्रहरीको प्रारम्भिक अनुसन्धान अनुसार, कामबाट हटाइएपछि रामले बदला स्वरूप हत्या गर्ने योजना बनाएको देखिएको छ। उनले वीरगन्जस्थित एक होटलमा प्रमोद साह तुरहासँग मदिरा सेवन गर्दै हत्या योजना बनाएको बयान प्रहरीलाई दिएका छन्।
योजनाअनुसार उनीहरू राति करिब १० बजे उद्योग पुगेका थिए। त्यहाँ सिंहमाथि धारिलो हतियार र इट्टाले प्रहार गरी हत्या गरिएको बताइन्छ। घटनापछि आरोपितहरूले उद्योगभित्रको CCTV क्यामरा समेत फुटाएका थिए।
घटनालगत्तै प्रहरी उपरीक्षक नरेन्द्र कुवँर र अपराध अनुसन्धान शाखाका प्रहरी नायब निरीक्षक दीपक बस्नेतको टोलीले अनुसन्धान थालेको थियो। अनुसन्धानमा सहयोगका लागि प्रदेश प्रहरी कार्यालयबाट तालिमप्राप्त कुकुर समेत परिचालन गरिएको थियो । पक्राउ परेका रामले हत्यामा संलग्नता स्वीकार गर्दै ‘कामबाट हटाएको आक्रोशमा हत्या गरेको’ प्रारम्भिक बयान दिएका छन्।
बाराका निमित्त प्रहरी प्रवक्ता तथा प्रहरी निरीक्षक खेमप्रसाद नेपालका अनुसार हत्यामा प्रयोग गरिएका धारिला हतियारहरु बरामद गरिएको छ । उनीहरूविरुद्ध कर्तव्य ज्यान मुद्दामा थप अनुसन्धान अघि बढाइएको छ।
