रौतहटमा खेतको घाँस काट्ने विवादमा कुटपिट, तीन महिला घाइते
रौतहटः रौतहटको देवाही गोनाही नगरक्षेत्र अन्तर्गत खेतमा घाँस काट्ने विषयलाई लिएर भएको विवादले हिंसात्मक रूप लिँदा तीन महिला गम्भीर घाइते भएका छन् । सोमबार राति भएको सामूहिक आक्रमणमा संलग्न रहेका एक जनालाई प्रहरीले पक्राउ गरेको छ ।
घाइते हुनेहरूमा वडा नं ५ टिकुलिया गाउँका महेश तिवारीकी २५ वर्षीया छोरी अस्मिता तिवारी, १५ वर्षीया छोरी सुस्मिता तिवारी तथा छिमेकी बचेलाल मुखिया बिनकी ४० वर्षीया श्रीमती अनतिया बिन रहेको पीडित पक्षले जनाएको छ ।
महेश तिवारीका भतिज राजेश तिवारीका अनुसार अनतिया बिनको टाउकोमा गहिरो चोट लागेको छ भने अस्मिता र सुस्मिताको शरीरका विभिन्न भागमा चोटपटक लागेको छ ।
घटनालगत्तै घाइते तीनैजनालाई राति नै एम्बुलेन्समार्फत उपचारका लागि बाराको कलैयास्थित ए प्लस अस्पताल लगिएको थियो । अस्पताल स्रोतका अनुसार उनीहरूलाई आईसीयूमा राखेर उपचार भइरहेको र हाल अवस्था सामान्य हुँदै गएको छ ।
घटनामा संलग्न रहेको आरोपमा स्थानीय शङ्कर राय यादवका ४० वर्षीय छोरा शम्भु राय यादवलाई पक्राउ गरी इलाका प्रहरी कार्यालय गरुडाको नियन्त्रणमा राखिएको रौतहट प्रहरी प्रमुख एसपी सिताराम रिजालले जनाएका छन् ।
प्राप्त विवरण अनुसार महेश तिवारीको तोरीको खेतमा आइतबार शङ्कर राय यादवको घरका महिलाहरूले घाँस काटेका थिए । तोरी पाक्ने समयमा घाँस काट्दा क्षति पुगेको भन्दै सोमबार साँझ अस्मिता तिवारीले शङ्कर रायसँग गुनासो गरेपछि भनाभन भएको र सोही विवादले पछि हिंसात्मक रूप लिएको बताइएको छ ।
विवादपछि शङ्कर राय यादव, उनका छोरा शम्भु यादव तथा घरका महिलाहरू समेत तिवारीको घरभित्र पसेर फलामको रड लगायतका हतियार प्रयोग गरी अस्मिता र सुस्मितामाथि कुटपिट गरेका थिए ।
कुटपिट छुटाउन गएकी छिमेकी अनतिया बिनमाथि पनि गम्भीर आक्रमण गरिएको पीडित पक्षको आरोप छ । घटनासम्बन्धी थप अनुसन्धान भइरहेको जिल्ला प्रहरी कार्यालय रौतहटले जनाएको छ।
