१८ घण्टामै समातिए पानी उद्योगका प्रवन्धक सिंहको हत्यामा संलग्न अभियुक्त
सिमरा: प्रहरीले बाराको प्रसौनी गाउँपालिका ६ स्थित किरण वेभरेज पानी उद्योगमा कार्यरत प्रवन्धक रामकिशोर सिंहको हत्यामा संलग्न दुई जना पक्राउ परेका छन् ।
जिल्ला प्रहरी कार्यालय बाराबाट खटिएको प्रहरी टोलीले हत्यामा संलग्न दुई जनालाई पक्राउ गरेको हो । पक्राउ परेका दुबै जनालाई जिल्ला प्रहरी कार्यालय बारा राखिएको छ ।
प्रहरीले पक्राउ परेका व्यक्तिलाई शनिबार बिहान सार्वजनिक गर्ने भएको छ । प्रहरीले पक्राउ परेका व्यक्तिको पहिचान खुलाएको छैन ।
बाराको प्रसौनी ६ स्थित किरण वेभरेज प्रालि पानी उद्योगमा कार्यरत सर्लाही धनकौल गाउँपालिका २ का ४२ वर्षीय रामकिशोर सिंहको घाटी रेटेर हत्या भएको थियो ।
पानी उद्योगदेखि ५० मिटर उत्तरतर्फ धारिलो हतियारले रेटेर हत्या गरिएको अवस्थामा सिंहको शव फेला परेको थियो।
घटनालगत्तै अनुसन्धान थालेको प्रहरीले १८ घण्टा नबित्दै अभियुक्त समातेको हो ।
