सिमरामा सवारी दुर्घटनाः एक युवतीको मृत्यु, दुई घाइते
सिमराः जीतपुरसिमरा उपमहानगरपालिका ३ स्थित बजनीमा आइतबार बिहान ट्याक्टरले मोटरसाइकललाई ठक्कर दिँदा एक युवतीको मृत्यु भएको छ । मृत्यु हुनेमा जीतपुरसिमरा उपमहानगरपालिका ७ की २० वर्षीया ज्योतीकुमारी गुप्ता रहेकी छिन् ।
घटनामा अन्य दुई जना घाईते भएका छन् । सिमराबाट जीतपुरतर्फ जाँदै ना३त १०९८ नम्बरको ट्याक्टरले सोही दिशाबाट जाँदै गरेको मधेश प्रदेश ०३–०३२प९५९० नम्बरको मोटसाइकललाई ठक्कर दिँदा दुर्घटना भएको हो ।
ट्याक्टरले ठक्कर दिँदा मोटरसाइकल अनियन्त्रित भई सोही दिशाबाट गुडिरहेको साइकलमा ठोक्किन पुगेको थियो । घटनामा मोटरसाइकल चालक ज्योतिसहित पछाडी सवार जीतपुरसिमरा ७ की आस्था गुप्ता र साइकल चालक जीतपुरसिमरा २ का ४२ वर्षीय कृष्ण मगर घाइते भएका छन् ।
घाइतेमध्ये ज्योतीको उपचारका क्रममा बयोधा अस्पतालमा मृत्यु भएको हो । अन्य घाइतेको उपचार भईरहेको बाराका निमित्त प्रहरी प्रवक्ता एवम् प्रहरी निरीक्षक खेमप्रसाद नेपालले जानकारी दिएका छन् ।
