एसईईको पहिलो दिनः बारामा एक हजार सात सय ६४ परीक्षार्थी अनुपस्थित
सिमराः आजदेखि देशभर सुरु भएको यस वर्षको माध्यमिक शिक्षा परीक्षा (एसईई) को पहिलो दिन बारामा एक हजार सात सय ६४ जना परीक्षार्थी अनुपस्थित भएका छन् ।
शिक्षा विकास तथा समन्वय इकाई बाराका अनुसार पहिलो दिनको अनिवार्य अङ्ग्रेजी विषयको परीक्षामा विभिन्न विधाका परीक्षार्थीहरू अनुपस्थित भएका हुन् ।
इकाईका निमित्त प्रमुख अशोक कुमार रौनियारले दिएको जानकारीअनुसार साधारणतर्फ नियमितका ९५ जना र ग्रेडवृद्धिका एक हजार ६ सय १३ जना अनुपस्थित भएका छन् । त्यसैगरी प्राविधिकतर्फ नियमितका चार जना र ग्रेडवृद्धिका ५२ जना गरी कुल एक हजार सात सय ६४ परीक्षार्थी परीक्षामा सहभागी भएका छैनन् ।
जिल्लाभरका एक सय २ सामुदायिक र ५३ संस्थागत विद्यालयका कुल १० हजार आठ सय १३ परीक्षार्थीहरूले आवेदन भरेकोमा पहिलो दिन ९ हजार ४९ जना मात्र परीक्षामा सहभागी भएको कार्यालयले जनाएको छ ।
बाराका ३० वटा परीक्षा केन्द्रमार्फत शान्तिपूर्ण रूपमा सञ्चालन भइरहेको यस वर्षको परीक्षा अन्तर्गत चैत २० गते (शुक्रबार) अनिवार्य नेपाली विषयको परीक्षा हुने तालिका रहेको छ ।
