आन्तरिक राजस्व कार्यालयका कर अधिकृत पाँच लाख घुसको रकमसहित पक्राउ
सिरहाः आन्तरिक राजस्व कार्यालय लहान सिरहाका कर अधिकृत युवराज पाल पाँच लाख घुस लिँदै गर्दा अख्तियार दुरुपयोग अनुसन्धान आयोगको टोलीद्वारा पक्राउ परेका छन् । अख्तियारको बर्दिबास कार्यालयबाट खटिएको टोलीले उनलाई घुस रकमसहित नियन्त्रणमा लिएको हो ।
अख्तियार बर्दिबासका प्रमुख रामबहादुर कुरुम्वाङका अनुसार सिरहा सुपर मार्केट प्रालिको आर्थिक वर्ष २०७८।७९ को पूर्ण कर परीक्षण (फूल अडिट) गर्ने क्रममा कर अधिकृत पालले सेवाग्राहीसँग घुस माग गरेका थिए । उनले आफूभन्दा माथिल्ला कर अधिकृतसहित अन्य व्यक्तिहरूलाई समेत मिलाउनुपर्ने बहाना बनाउँदै घुस मागेको बताइएको छ ।
घुस रकम नदिएसम्म अडिट प्रक्रिया अगाडि नबढाइने भन्दै कम्पनीसँग कागजात पेस गराइएको थियो । अडिटका क्रममा कर, जरिवाना तथा अन्य शीर्षकमा करिब दुई करोडसम्म दायित्व पर्ने जनाएको र कम्पनीले थप कागजात पेस गर्दै जाँदा दोस्रो चरणमा थप ३० देखि ३५ लाखसम्म कर दायित्व बढ्न सक्ने बताउँदै घुसको रकम बढाउँदै लगिएको थियो ।
अधिकृत पालले १२ लाख दिए सबै समस्या समाधान गरिदिने प्रस्ताव राखेका थिए । कम्पनीले आफ्नो आर्थिक अवस्था कमजोर रहेको बताएपछि अन्ततः रकम घटाएर पाँच लाखमा सहमति गर्न खोजिएको थियो ।
घुस बुझ्ने योजनाअनुसार कम्पनीका प्रतिनिधिलाई बुधबार दिउँसो १ बजेदेखि २ बजेसम्म पर्खाएर राखिएको थियो । सोही दिन साँझ ६ः५६ बजे पालले फोन गरी आफू गोलबजार क्षेत्रमा रहेको जानकारी दिएका थिए । त्यसपछि उनले पुनः सम्पर्क गरी भोलिपल्ट बिहान ९ देखि १० बजेको बीचमा भेट्ने भन्दै एक बिचौलियाको नम्बर पठाएका थिए ।
बिचौलियाले आफू बाहिर रहेको भन्दै भाइमार्फत रकम बुझाउन आग्रह गरे पनि अन्ततः अधिकृत पालले रकम सिधै कार्यालयमै ल्याउन भनेका थिए । कार्यालयमै रकम बुझ्ने क्रममा अख्तियारको टोलीले अधिकृत पाललाई नियन्त्रणमा लिएको हो ।
