गरिमा हत्या प्रकरणः न्याय माग्दै २४ घण्टादेखि सडकमा प्रदर्शन जारी
सिमराः बाराको जीतपुरसिमरा उपमहानगरपालिका–१ की तीन वर्षीया बालिका गरिमा (गढिमा) चौधरीको बलात्कारपछि हत्या गरिएको घटनाको विरोधमा स्थानीयको प्रदर्शन बिहीबार पनि जारी छ । प्रदर्शनका कारण पथलैया–वीरगन्ज सडकखण्ड २४ घण्टादेखि ठप्प छ ।
घटनाको विरोध गर्दै स्थानीयले बुधबार बिहान करिब ११ बजेदेखि सडक अवरुद्ध गरेका थिए । टायर बालेर प्रदर्शनमा उत्रिएका स्थानीयले रातभर सडक छोडेनन् । उनीहरुले बिहीबार बिहानदेखि सडकमा टेन्ट राखेर प्रदर्शनलाई निरन्तरता दिएका छन् ।
घटनाबाट आक्रोशित पीडित परिवार र स्थानीयले कानुन संसोधन गरेर दोषीमाथि कडा सजाय हुनुपर्ने, जिम्मेवार प्रहरी कर्मचारीमाथि कारवाही गरिनुपर्नेलगायतका माग राखेका छन् । स्थानीय प्रदर्शनमा उत्रिएपछि बुधबार साँझ पीडित पक्ष र प्रशासनबीच केहीबेर छलफल समेत भएको थियो । उक्त छलफल निष्कर्षविहिन बनेपछि स्थानीयले आन्दोलन जारी राखेका हुन् ।
यता घटनाको विरोधमा पथलैया, सिमरा, जीतपुर, डुमरवानालगायतका क्षेत्रमा पनि स्थानीयले टायर बालेर प्रदर्शन गरेका छन् । तीन वर्षीया अवोध बालिकामाथि भएको बलात्कार र हत्याजस्तो जघन्य अपराधमा संलग्न दोषीमाथि हदैसम्मको कारवाहीको माग गरिएको छ ।
साउन ३१ गते जीतपुरसिमरा उपमहानगरपालिका–१ दसधुरेबाट हराएकी तीन वर्षीया बालिका गरिमा मंगलबार साँझ मृत भेटिएकी थिइन् । उनको बलात्कारपछि हत्या गरिएको अवस्थामा शव फेला परेको हो । हराएको स्थानदेखि करिब डेढ सय मिटर दक्षिणतर्फ पाँच महिनादेखि खाली रहेको एक सुनसान घरमा अर्धनग्न अवस्थामा बालिकाको शव फेला परेको थियो ।
घटनामा संलग्न रहेको आरोपमा प्रहरीले एक १६ वर्षीय बालक र २४ वर्षीय प्रोग्रेस चौधरीलाई नियन्त्रणमा लिएको छ । चौधरी म्याजिक गाडीका चालक र १६ वर्षीय बालक सहचालक हुन् । मृतक बालिका र म्याजिक गाडीका चालकको घर करिब एक सय मिटरको दुरीमा छ ।
पीडित परिवारले घटनामा १६ वर्षीय बालकसँगै म्याजिकका चालक चौधरीको पनि संलग्नता रहेको आरोप लगाउँदै आएका छन् । चौधरीकै घरमा बालिकाको हत्या गरेर सुनसान रहेको घरमा शव व्यवस्थापन गरिएको मृतककी बुवा मनोज चौधरीको भनाइ छ । प्रहरीले म्याजिक चालक चौधरीको पत्नीसहित परिवारका अन्य सदस्यलाई समेत अनुसन्धानका लागि नियन्त्रणमा लिएको बताइएको छ ।
प्रहरीको प्रारम्भिक अनुसन्धानले भने घटनामा १६ वर्षीय बालकको संलग्नता देखाएको छ । शव भेटिएलगत्तै पक्राउ परेका बालकले चकलेटको प्रलोभन देखाएर आफूले बालिकामाथि बलात्कार र हत्या गरेको बयान दिएका छन् । बालक र म्याजिक चालक चौधरीलाई बारा जिल्ला अदालतबाट चार दिनको म्याद थप गरि अनुसन्धान भईरहेको बाराका प्रहरी उपरीक्षक नरेन्द्र कुँवरले बताएका छन् ।
