अपडेटः नारायणी अस्पतालबाट चोरी भएका एक दिने शिशुको सकुशल उद्धार, एक महिला पक्राउ
वीरगन्जः वीरगन्जस्थित नारायणी अस्पतालबाट चोरी भएका एक दिने नवजात शिशुलाई प्रहरीले करिब १६ घण्टापछि सकुशल उद्धार गरेको छ। शिशु चोरीमा संलग्न रहेको अभियोगमा प्रहरीले एक महिलालाई पनि नियन्त्रणमा लिएको छ ।
पक्राउ पर्नेमा वीरगन्ज महानगरपालिका-१६ इनर्वा निवासी सबिना खातुन रहेकी छन् । पर्साका प्रहरी उपरीक्षक पवन भट्टराईका अनुसार रातभरि सञ्चालन गरिएको खोजीका क्रममा सोमबार इनर्वाबाट खातुनलाई शिशुसहित पक्राउ गरिएको हो ।
अस्पतालमा शिशुकी हजुरआमासँग आरोपी महिलाले बच्चा खेलाउँछु भन्दै मागेकी थिइन् । शिशु हातमा लिएपछि ती महिला अस्पतालबाटै बेपत्ता भएकी थिइन् । परिवारले तत्काल प्रहरीलाई खबर गरेपछि प्रहरीले अनुसन्धान र खोजी कार्यलाई तीव्र बनाएको थियो ।
पक्राउ परेकी सबिना खातुन र उद्धार गरिएका नवजात शिशु दुवैलाई जिल्ला प्रहरी कार्यालय पर्सामा राखिएको छ । शिशुको स्वास्थ्य परीक्षण गराई परिवारको जिम्मा लगाउने तयारी भइरहेको छ ।
