फेटामा अस्पताल उद्घाटनको विवादमा प्रहरीको गोली लागेर बालक घाइते, स्थिति तनावपूर्ण
सिमराः बाराको फेटा गाउँपालिकामा नवनिर्मित १५ शैयाको अस्पताल उद्घाटनको विषयलाई लिएर भएको विवादले उग्र रूप लिँदा प्रहरीको गोली लागेर एक बालक गम्भीर घाइते भएका छन् ।
अस्पतालको भवन निर्माण भए पनि विद्युत् र फर्निचरलगायतका आवश्यक पूर्वाधारहरूको काम पूरा नभएकाले अधुरो भवन उद्घाटन गर्न नहुने भन्दै स्थानीयवासीले बिहानैदेखि विरोध प्रदर्शन गरेका थिए । गाउँपालिकाका अध्यक्ष रुस्तम अंसारीले स्थानीयको विरोधका बाबजुद पनि उद्घाटन गर्ने अडान लिएपछि दुवै पक्षबीच तनाव बढेको थियो ।
स्थिति नियन्त्रणमा लिने क्रममा प्रहरीले बल प्रयोग गर्दा झडपको स्थिति सिर्जना भएको थियो । सोही दोहोरो झडपका क्रममा प्रहरीले चलाएको गोली लागेर फेटा गाउँपालिका-३ का १४ वर्षीय आदित्य पासवान गम्भीर घाइते भएका छन् ।
घाइते पासवानको वीरगन्जस्थित नेशनल मेडिकल कलेजमा उपचार भइरहेको छ भने उनको शरीरबाट गोली निकालिएको छ । बालकलाई गोली लागेपछि थप आक्रोशित भएका स्थानीयवासीले नौ वटा मोटरसाइकलमा आगजनी गरेका छन् ।
घटनापछि अहिले फेटाको स्थिति तनावपूर्ण बनेको छ र स्थिति नियन्त्रणमा लिन जिल्ला सुरक्षा समितिको बैठक बसिरहेको छ ।
