प्रतिनिधिसभा बैठकमा बोले बाराका चार सांसद, कसले के भने ?
सिमराः बाराको चार वटा निर्वाचन क्षेत्रबाट निर्वाचित चार जना सांसदले शुक्रबार प्रतिनिधिसभा बैठकको विभिन्न समयमा बोलेका छन् ।
बाराको क्षेत्र नं. १ बाट निर्वाचित अच्युत मैनाली, क्षेत्र नं. २ बाट निर्वाचित उपेन्द्र यादव, क्षेत्र नं. ३ बाट निर्वाचित ज्वालाकुमारी साह र क्षेत्र नं. ४ बाट निर्वाचित कृष्णकुमार श्रेष्ठ (किसान) ले समय लिएर बोलेका हुन् ।
संसदमा सांसद मैनाली र पूर्वमन्त्री श्रेष्ठले वन्यजन्तुको आक्रमणबाट भएको मानवीय क्षति र त्यसको नियन्त्रणका लागि गम्भीर हुन् आग्रह गरेका थिए । दुवै सांसदले ऊखु किसानको समस्या समेत संसदमा उठाए ।
यसैगरी सांसद एवम् पूर्वमन्त्री साहले भूमीहिन सुकुम्बासी र ऊखु किसानको समस्यालाई उठाइन् । पूर्व कृषी मन्त्री समेत रहेकी साहले ऊखु किसानको समस्यालाई तत्काल सम्बोधन गर्न आवश्यक रहेको बताईन् ।
पूर्व उपप्रधानमन्त्री समेत रहेका बारा २ का सांसद उपेन्द्र यादवले संघीयता र समावेशितालाई कार्यान्यवनमा ल्याउन जरुरी रहेको औल्याए । उनले मौलिक हक कार्यान्यवनमा ल्याउन ढिलाई भईरहेको प्रति असन्तुष्टी जनाउँदै त्यसतर्फ सरकारको ध्यानाकर्षण गराएका थिए ।
