लालबकैया नदीमा बाढीको जोखिम: तटबन्ध जोगाउन सुरक्षाकर्मी परिचालन, स्थानीयलाई सजग रहन आग्रह
रौतहटः लगातारको वर्षाका कारण रौतहटको लालबकैया नदीमा पानीको सतह बढेपछि वरपरका क्षेत्रमा तटबन्ध भत्किने खतरा बढेको छ। बाढीको जोखिमबाट स्थानीय बस्तीहरूलाई बचाउनका लागि जिल्ला प्रशासन र सुरक्षा निकायले सो क्षेत्रमा निगरानी बढाएका छन् ।
प्रमुख जिल्ला अधिकारी लक्ष्मीप्रसाद पौडेलको नेतृत्वमा नेपाली सेना, नेपाल प्रहरी र सशस्त्र प्रहरीका प्रमुखहरू सम्मिलित टोलीले आइतबार राजपुर र मौलापुर क्षेत्रका तटबन्ध तथा पुलको स्थलगत निरीक्षण गरेको छ । मौलापुरको मर्यादपुर र फतुवा पुल नजिकको तटबन्धमा क्षति पुगेमा आसपासका धेरै गाउँहरूसहित सदरमुकाम गौरसम्मै बाढीको पानी पस्न सक्ने जोखिम देखिएको छ।
तटबन्धलाई भत्किन नदिनका लागि कटान सुरु भएका ठाउँहरूमा बाँस गाड्ने र बालुवा भरिएका बोराहरू राखेर मर्मत गर्ने काम तीव्र पारिएको छ । नदीमा पानीको बहाव अझै बढ्न सक्ने सम्भावना रहेकाले जिल्ला प्रशासनले नदी आसपासका बासिन्दाहरूलाई उच्च सतर्कता अपनाउन र सुरक्षित रहन अपिल गरेको छ ।
