जीतपुरसिमरा १६ को घोषणाः उच्च शिक्षा अध्ययन गर्न चाहने पाँच विद्यार्थीलाई पूर्ण छात्रवृत्ति
![](https://i0.wp.com/www.eshilalekh.com/wp-content/uploads/2023/11/ward-16-office-scaled.jpg?fit=2560%2C1374&quality=95&strip=all&ssl=1)
सिमराः जीतपुरसिमरा उपमहानगरपालिका वडा नं. १६ को कार्यालयले आर्थिक अवस्थाका कारण उच्च शिक्षा अध्ययन गर्न नपाएका पाँच विद्यार्थीलाई पूर्ण छात्रवृत्ति उपलब्ध गराउने भएको छ ।
आर्थिक अभावले स्नातक तहको अध्ययन छाडेका वा पढ्न नपाएका विद्यार्थीमध्ये पाँच जनालाई पूर्ण छात्रवृत्ति उपलब्ध गराउने निर्णय वडा कार्यालयले गरेको हो ।
वडाध्यक्ष हरिदेव खरेलले एक सूचना जारी गर्दै वडाभित्र बसोबास गर्ने विद्यार्थीलाई उच्च शिक्षा अध्ययन गर्ने चाहना भए सम्पर्क गर्न आग्रह गरेका छन् । वडा कार्यालयमा सम्पर्क गर्ने विद्यार्थीमध्ये पाँच जनालाई अध्ययनका लागि वडा कार्यालयले सहयोग गर्ने वडाध्यक्ष खरेलको भनाई छ ।
खरेलका अनुसार डुमरवाना बहुमुखी क्याम्पसमा कुनै पनि संकायमा अध्ययन गर्न सकिनेछ । विद्यार्थीले आफूहले चाहेको संकायमा अध्ययन गर्न सक्ने र सोका लागि लाग्ने सम्पूर्ण खर्च वडा कार्यालयले व्यहोर्ने वडाध्यक्ष खरेलले ईशिलालेखलाई जानकारी दिए ।
![](https://i0.wp.com/www.eshilalekh.com/wp-content/uploads/2023/11/ward-16.jpg?resize=720%2C686&quality=95&strip=all&ssl=1)