राष्ट्रिय क्रिकेट खेलाडीको सम्मानमा अमेरिकाको टेक्ससमा रात्री भोजको आयोजना
![](https://i0.wp.com/www.eshilalekh.com/wp-content/uploads/2024/06/Cricket_nepal_usa.jpg?fit=2000%2C1074&quality=95&strip=all&ssl=1)
रामप्रसाद अधिकारी
अमेरिका (ड्यालस): आईसीसी टी–२० विश्वकप क्रिकेटमा सहभागी हुन अमेरिकाको टेक्ससमा रहेको नेपाली राष्ट्रिय टोलीको सम्मानमा स्वागत तथा रात्री भोज कार्यक्रमको आयोजना गरिएको छ । गैरआवासीय नेपाली संघ (एनआरएनए) राष्ट्रिय समन्वय परिषद् अमेरिकाले क्रिकेट खेलाडीलाई स्वागत तथा सम्मान गरेको हो ।
जुन ४ गते नेदरल्याण्डविरुद्ध पहिलो खेल खेल्दै विश्वकप सुरुवात गर्न लागेको टोलीलाई उर्जा र हौसला प्रदान गर्न एनआरएनए राष्ट्रिय समन्वय परिषद् अमेरिकाले कार्यक्रमको आयोजना गरेको टेक्सास च्यापटका अध्यक्ष दिपेन्द्र गुरागाईंले बताए । कार्यक्रममा एनआरएनए अमेरिकाका वरिष्ठ उपाध्यक्ष विकास उप्रेती, उपाध्यक्ष भानु खरेल, नेपाल क्रिकेट संघका अध्यक्ष चतुरबहादुर चन्द, कप्तान रोहित पौडेललगायतले मन्तव्य राखेका थिए ।
कार्यक्रममा बोल्दै कप्तान पौडेलले नेपाली खेलाडीको हौसल बढाउन मैदानमा उपस्थित हुन अमेरिकास्थित नेपाली दर्शकलाई आग्रह गरेका थिए । कार्यक्रममा एनआरएनका विभिन्न तहका प्रतिनिधि, संचारकर्मीलगायतको उपस्थिती रहेको एनआरएनए राष्ट्रिय समन्वय परिषद् अमेरिकाका कोषाध्यक्ष सरोज सिग्देलले जानकारी दिए ।