राष्ट्रिय क्रिकेट खेलाडीको हौसला बढाउन सिमराका युवा व्यवसायीले गरे पुरस्कारको घोषणा
सिमराः टी–२० विश्वकप क्रिकेटमा सहभागी नेपाली राष्ट्रिय टिमका खेलाडीको हौसला बढाउन बारा सिमराका तीन युवा व्यवसायीले पुरस्कार राशीको घोषणा गरेका छन् ।
अमेरिकामा मंगलबार राती ९.१५ बजे नेदरल्याण्डविरुद्ध पहिलो खेल खेल्न लागेको राष्ट्रिय टिमका खेलाडीका लागि सिमराका युवा व्यवसायी रवीकुमार गुप्ता, शम्भु खड्गी र निराजन खरेलले पुरस्कारको घोषणा गरेका हुन् ।
होटल तथा पर्यटन व्यवसायी संघ बाराका अध्यक्ष समेत रहेका युवा व्यवसायी खड्गीका अनुसार राष्ट्रिय टिमका खेलाडीले बनाएको प्रति रनको एक सय, प्रति विकेटको एक हजार र प्रति डट बलको एक सय रुपैया घोषणा गरिएको हो ।
प्रतियोगिता सम्पन्न पछि घोषणा अनुसारको नगद पुरस्कार राष्ट्रिय टिमलाई एकमुष्ठ हस्तान्तरण गरिने खड्गीले जानकारी दिए । राष्ट्रिय टिमका खेलाडीलाई हौसला बढाउन युवा व्यवसायी मिलेर उक्त पुरस्कार प्रदान गर्न लागिएको खड्गीको भनाई छ ।
खड्गी श्रेष्ठ होटल एण्ड रेसिडेन्सीका संचालक हुन भने खरेल निर्माण व्यवसायी र गुप्ता खाद्य व्यवसायी हुन् ।
