वीरगन्जले उचाल्यो पथलैया भेट्रान फूटबलको उपाधि
पथलैयाः सिटी भेट्रान वीरगन्जले प्रथम पथलैया भेट्रान फूटबल प्रतियोगिताको उपाधि उचालेको छ । पथलैयास्थित श्रीकृष्ण मन्दिर खेल मैदानमा शनिबार साँझ भएको फाइनल खेलमा विकासशील भेट्रान क्लब सिमरालाई २–० ले पराजित गर्दै वीरगन्जले उपाधि उचालेको हो ।
उपाधिसंगै वीरगन्जले ५० हजार र उपविजेताले सिमराले २५ हजार नगद हात पारेको छ । प्रतियोगिताको सर्वोत्कृष्ट खेलाडी ओमलाल क्षेत्री घोषित भएका छन् । सर्वाधिक गोलकर्ताको पुरस्कार समेत पाएका उनले एक थान साइकल प्राप्त गरेका छन् ।
विधागततर्फ प्रतियोगिताको उत्कृष्ट मिडफिल्ड विकासशीलका डेनिश श्रेष्ठ, उत्कृष्ट डिफेन्डर वीरगन्जका रामबाबु चौधरी, उत्कृष्ट गोलरक्षक वीरगन्जका विनोदकुमार चौधरी घोषित भए । फाइनल खेलको प्लेयर अफ दि म्याच वीरगन्जका तेजबहादुर मगर घोषित भएका छन् ।
विजेता तथा उपविजेता खेलाडीलाई जीतपुरसिमरा उपमहानगरपालिका वडा नं. १ का वडाध्यक्ष हिराबहादुर गुरुङ, वडा नं. २ का वडाध्यक्ष धनबहादुर श्रेष्ठ, जीतपुरसिमरा १ का वडासदस्य अमन लामा, जीतपुरसिमरा २ का वडा सदस्य बिशाल घिमिरे, नेपाली कांग्रेसकी नेतृ मेघा शाहीलगायतले पुरस्कार वितरण गरेका थिए ।
जीतपुरसिमरा उपमहानगरपालिकाको मुख्य सहयोगमा पथलैया भेट्रान क्लबले आयोजना गरेको प्रतियोगितामा बारा र पर्साका १५ टिमको सहभागिता थियो ।
