वीरगन्जमा जापानिज इन्सेफलाइटिसका बिरामी फेला, सतर्कता अपनाउन आग्रह
वीरगन्जः पर्साको वीरगन्ज महानगरपालिका र ठोरी गाउँपालिकामा जापानिज इन्सेफलाइटिसका दुई बिरामी फेला परेका छन् । वीरगन्ज महानगरपालिका ८ बस्ने ८ वर्षीय बालक र ठोरी गाउँपालिका ३ बस्ने ८४ वर्षीया वृद्ध महिलामा जापनिज इन्सेफलाइटिसको सङ्क्रमण पुष्टि भएको हो ।
वृद्ध महिलाको काठमाडौँस्थित न्युरो अस्पतालमा उपचार भएको थियो । उनको स्वास्थ्यमा केही सुधार आएपछि डिस्चार्ज भई घर फर्किसकेकी छन् । सङ्क्रमित बालकको अवस्था भने गम्भीर रहेको छ ।
पोथी लामखुट्टेको टोकाइबाट सर्ने यो संक्रमण पुष्टि भएपछि स्थानीय स्वास्थ्य निकायले सतर्कता अपनाउन आग्रह गरेको छ । जापानिज इन्सेफलाइटिस ‘फ्ल्याभिफाइरस’ वर्गको एक भाइरसबाट हुने रोग हो । जसलाई ‘क्यूलेक्स’ प्रजातिको लामखुट्टेले सार्छ । यो लामखुट्टे विशेषगरी बिहान र बेलुका सक्रिय हुन्छ ।
