बारामा पानी उद्योगको प्रवन्धकको हत्या
सिमराः बाराको प्रसौनी ६ स्थित किरण वेभरेज प्रालि पानी उद्योगमा कार्यरत प्रवन्धकको घाटी रेटेर हत्या भएको छ । सर्लाही धनकौल गाउँपालिका २ का ४२ वर्षीय रामकिशोर सिंहको उद्योग नजिकै शव फेला परेको हो ।
उद्योगदेखि ५० मिटर उत्तरतर्फ धारिलो हतियारले रेटेर हत्या गरिएको अवस्थामा सिंहको शव फेला परेको हो । प्रहरीले सिंहको शव शल्यपरीक्षणका लागि कलैया अस्पताल पठाएको छ ।
जिल्ला प्रहरी कार्यालय बाराका प्रवक्ता एव्म प्रहरी नायब उपरीक्षक बिजयराज पण्डितले घटनाको विषयमा अनुसन्धान सुरु गरिएको बताए । सिंहको हत्याको कारण भने खुल्न सकेको छैन ।
प्रहरीले प्रदेश कार्यालयबाट कुकुर ल्याएर हत्या गर्नेको पहिचान खोज्ने प्रयास गरिरहेको छ । झाडीमा छोपेको अवस्थामा भेटिएका सिंहको मोबाइल भेटिएको छैन । उद्योगभित्रको सिसिटीभी क्यामरा समेत फुटाएको अवस्थामा रहेको प्रहरीले जनाएको छ ।
प्रवन्धक सिंह उद्योगमै बस्ने गरेका थिए ।
