जेन–जी आन्दोलनका क्रममा कारागारबाट फरार बाराका दुई अभियुक्त पक्राउ
वीरगन्जः पर्सा प्रहरीले जेन–जी आन्दोलनका क्रममा केन्द्रिय कारागार काठमाण्डौबाट फरार भएका दुई कैदीहरुलाई पक्राउ गरेको छ ।
पक्राउ पर्नेमा जिल्ला बारा विश्रामपुर गाउँपालिका ५ का २५ वर्षीय सुदामा पासवान रहेका छन् । प्रहरीले पासवानलाई मंगलवार राति लुकीछिपी बस्दै आएको अवस्थामा वीरगन्ज महानगरपालिका १५ भिष्वाबाट पक्राउ गरेको हो ।
पासवान कर्तव्य ज्यान मुद्दामा २५ वर्ष कैद भुक्तान गरिरहेका थिए । भदौ २३ गते भएको जेन–जी आन्दोलनका क्रममा उनि कारागारबाट फरार भएका थिए ।
यसैगरी पक्राउ पर्नेमा बाराको परवानिपुर गाउँपालिका २ का ३२ वर्षीय विवेकलाल साह कानु रहेका छन् । प्रहरीले कानुलाई मंगलवार दिउँसो वीरगन्ज महानगरपालिका ४ विर्ता टोलबाट लुकीछिपी बसेको अवस्थामा पक्राउ गरेको हो ।
कानु बैंकिङ कसुर मुद्दामा उच्च अदालत पाटनको हेटौडा इजलासको आदेशअनुसार ५० हजार रुपैयाँ धरौटी तिर्न नसकी केन्द्रीय कारागार चलान भएका थिए । उनी भदौ २४ गते आन्दोलनका क्रममा फरार भएका थिए ।
पक्राउ परेका दुवै जनालाई वीरगन्ज कारागारमा बुझाइएको जिल्ला प्रहरी कार्यालय पर्साका प्रवक्ता एवं प्रहरी नायव उपरीक्षक राजु कार्कीले जानकारी दिए ।
