लायन्स डिष्ट्रीक २-एक्स १ सदस्य वृद्धि क्षेत्रमै सर्वोत्कृष्ट ठहर, जे सी रोबिन्सन कपबाट सम्मानित


रामप्रसाद अधिकारी

१४ श्रावण २०८२, बुधबार ०५:५२

टेक्सास (अमेरिका): लायन्स क्लब्स इन्टरनेशनलले लायन्स डिष्ट्रीक २-एक्स १ लाई २०२४–२०२५ को लागि जे सी रोबिन्सन सदस्य वृद्धि कप प्रदान गरिएको छ। यो पुरस्कार लायन्स क्लब्सको विश्वव्यापी ८ वटा संविधानिक क्षेत्रहरूमध्ये प्रत्येकबाट सर्वश्रेष्ठ सदस्य वृद्धि हासिल गर्ने एक-एक जिल्ला वा बहु-जिल्लालाई मात्र प्रदान गरिन्छ।

चार सय दुई नयाँ सदस्यहरूको उल्लेखनीय वृद्धिसहित, डिष्ट्रीक २-एक्स १ अहिले ७१ लायन्स क्लब र २१ लियो क्लबमार्फत करिब २,३०० लायन्स र ६०० युवाहरूको सक्रिय संलग्नतासहित सेवा कार्यमा अग्रसर छ। जिल्लाले टेक्सास राज्यको डल्लास, हन्ट, एलिस, कौफम्यान, र रकवाल काउन्टीसहित कोलिन काउन्टीका केही सहरहरूमा सेवा विस्तार गरिरहेको छ।

जिल्लाको यो ऐतिहासिक सफलताको श्रेय जिल्ला गभर्नर राधाकृष्ण काफ्ले, पहिलो उप-जिल्ला गभर्नर केदार तिमल्सिना र दोस्रो उप-जिल्ला गभर्नर गेरी विनयार्डको सशक्त नेतृत्वलाई दिइएको छ। गभर्नर काफ्लेले आफ्नो कार्यकाल २०२४–२०२५ मा ७ वटा नयाँ क्लब, ५ लियो क्लब, ३ क्लब शाखा र १ शाखा क्लब स्थापनासहित संगठन विस्तारमा रेकर्ड बनाएका छन्।

नेपाली मूलका नेतृत्वद्वारा लगातार दोस्रो वर्ष नेतृत्व

डिष्ट्रीक २-एक्स १ को ६४ वर्षे इतिहासमा पहिलोपटक सन् २०२३–२०२४ मा नेपाली मूलका प्रकाश गौतमले गभर्नरको जिम्मेवारी सम्हालेका थिए। सोही परम्परा कायम राख्दै २०२४–२०२५ मा पुनः नेपाली मूलका राधाकृष्ण काफ्ले गभर्नर चयन भए भने आगामी कार्यकालका लागि समेत नेपाली मूलका केदार तिमल्सिना निर्वाचित भइसकेका छन्।

सेवामा अग्रणी: १ लाख ३५ हजार घण्टा स्वयंसेवा

डिष्ट्रीक २-एक्स १ ले हालसम्म १,३५,८६२ घण्टा स्वयंसेवा गर्दै ७,६५,९५६ जनालाई प्रत्यक्ष सेवा पुर्‍याएको तथ्याङ्क सार्वजनिक गरिएको छ। सदस्य संख्याको मात्र वृद्धिमा नभई, सदस्य संरक्षण, नवप्रवर्तनात्मक सदस्यता अभियान र दीर्घकालीन सेवा विस्तारमा समेत यो उपलब्धि उदाहरणीय बनेको छ।

सम्मान समारोह ओर्लान्डोमा सम्पन्न

यो विशेष पुरस्कार जुलाई १३ देखि १७, २०२५ सम्म ओर्लान्डो, फ्लोरिडामा सम्पन्न लायन्स क्लब्स इन्टरनेशनलको १०७औं वार्षिक अन्तर्राष्ट्रिय सम्मेलनमा प्रदान गरिएको थियो। अन्तर्राष्ट्रिय अध्यक्ष फाब्रिसियो ओलिभेराले उक्त अवार्ड प्रदान गरेका थिए। कार्यक्रममा जिल्ला २-एक्स १ का १८ भन्दा बढी प्रतिनिधिहरूको सहभागिता रहेको जानकारी लायन्स लिंक सम्पादक तथा क्षेत्रीय अध्यक्ष राजेन्द्र कुँवरले दिएका छन्।

जे सी रोबिन्सन कपको महत्त्व

यो पुरस्कार लायन्स क्लब्स इन्टरनेशनलका पहिलो गैर-अमेरिकी अध्यक्ष जे सी रोबिन्सन (१९१९–१९२०) को सम्मानमा प्रदान गरिन्छ। स्थायी सदस्यता वृद्धिमा प्रेरणादायी नेतृत्व र दीर्घकालीन सेवाका लागि उत्कृष्ट प्रदर्शन गर्ने जिल्लालाई यो कप प्रदान गरिन्छ।

लायन्स डिष्ट्रीक २-एक्स १ को यस विश्वव्यापी मान्यताले नेपाली मूलका नेतृत्वको क्षमतामाथि नयाँ विश्वास जगाएको छ भने विश्वभरका लायन्स क्लबहरूलाई सदस्यता विस्तार र प्रभावकारी सेवातर्फ अझ प्रेरित बनाएको छ।

प्रतिक्रिया दिनुहोस्