जिल्ला प्रशासन कार्यालयमा पत्रकारमाथि रोकः पत्रकार संगठनद्धारा आपत्ति
प्रमोद सहनी
मकवानपुरः हेटौंडास्थित जिल्ला प्रशासन कार्यालय मकवानपुरमा समाचार संकलन गर्न गएका पत्रकारलाई कार्यालय प्रवेशमा रोक लगाइएको घटनाप्रति पत्रकारसम्बद्ध संघसंगठनले आपत्ति जनाएका छन् ।
नेपाल पत्रकार महासंघ मकवानपुरकी उपाध्यक्ष भावना रिजाल, सदस्य गणेश दुलाल, मनिल महत्तोलगायतका पत्रकारहरूलाई जिल्ला प्रशासन कार्यालयमा प्रवेश गर्न रोक लगाइएको घटनाको विरोध गर्दै नेपाल प्रेस युनियन मकवानपुर र प्रेस सेन्टर नेपाल मकवानपुरले आपत्ति जनाएका हुन् ।
पत्रकारहरु नेपाली कांग्रेस मकवानपुरद्वारा जनप्रतिनिधिमाथिको घटनाबारे ध्यानाकर्षण पत्र र रास्वपाको ज्ञापनपत्र बुझाउने कार्यक्रमका लागि त्यहाँ गएका थिए ।
घटनाको विरोधमा नेपाल प्रेस युनियन मकवानपुरका अध्यक्ष सुवास बिडारीले पत्रकारलाई प्रवेशमा रोक लगाउनु संविधान र सञ्चार ऐनको उलंघन भएको उल्लेख गरेका छन् । प्रेस स्वतन्त्रता, अभिव्यक्ति स्वतन्त्रता र सूचना प्राप्तिको अधिकार नेपालको संविधानले सुनिश्चित गरेको स्मरण गराउँदै बिडारीले यस्ता कार्यले लोकतान्त्रिक मूल्य र पत्रकारिताको स्वतन्त्रतामाथि गम्भीर खतरा उत्पन्न भएको बताए ।
यसैगरी प्रेस सेन्टर नेपाल मकवानपुरका अध्यक्ष एपी शर्माद्वारा हस्ताक्षरित विज्ञप्तिमा उक्त घटना प्रेस स्वतन्त्रतामाथिको खुला हमला भएको ठहर गर्दै दोषी निकायलाई कारबाहीको माग गरिएको छ ।
