मधेश प्रदेशमा नयाँ सत्ता समीकरण, जितेन्द्र सोनलको नेतृत्वमा सरकार गठनको दाबी
सिमराः मधेश प्रदेशमा नयाँ राजनीतिक समीकरण बनेको छ। मुख्यमन्त्री सतिषकुमार सिंहको राजीनामासंगै नयाँ सरकार गठनका लागि दलहरुबीच नयाँ समीकरण बनेको हो ।
पाँच दलबीच बनेको समीकरणले अबको मुख्यमन्त्रीमा लोसपा नेपालका मधेश प्रदेश अध्यक्ष एवम् बारा क्षेत्र नं. ४(२) का प्रदेशसभा सदस्य जितेन्द्र सोनललाई अघि सारेको छ । पाँच दलले बुधबार प्रदेश प्रमुख सुमित्रा सुवेदी भण्डारीसमक्ष दावी पेश गरेका छन् ।
लोसपा नेतृत्वको उक्त गठबन्धनमा जनता समाजवादी पार्टी (जसपा), जनमत पार्टी, नेकपा माओवादी केन्द्र र नेकपा एकीकृत समाजवादी पार्टी सम्मिलित छन् । प्रदेशसभाका दुई ठूला दल नेपाली कांग्रेस र नेकपा एमालेलाई बाहिर राख्दै अन्य पाँच दल सरकार बनाउन एकजुट भएका हुन् ।
नयाँ सरकारका लागि जसपा नेपालका १९, जनमत पार्टीका १३, नेकपा माओवादी केन्द्रका ९, लोसपा नेपालका ८ र एकीकृत समाजवादीका ७ सांसदसहित बहुमतका साथ दाबी पेश गरिएको छ।
यसअघि नेपाली कांग्रेसको नेतृत्वमा नेकपा एमाले र जनमत पार्टी सम्मिलित सरकार गठनको दाबी प्रस्तुत गरिएको थियो। तर उक्त समीकरण टुटेपछि नयाँ गठबन्धन बनेको हो।
