बाराका विभिन्न सीमा नाकाबाट ९ लाखभन्दा बढीको अवैध सामान बरामद, एक भारतीय नागरिक पक्राउ
सिमराः सशस्त्र प्रहरी बलले बाराका विभिन्न सीमा नाकाबाट भन्सार छली गरी नेपाल भित्र्याइएका करिब नौ लाख १० हजार रुपियाँ मूल्य बराबरका अवैध सामान बरामद गरेको छ ।
सशस्त्र प्रहरी बल, नेपाल नं. १२ गण हेडक्वार्टर बाराका अनुसार जिल्लाका विभिन्न इकाइबाट परिचालित टोलीले बीओपी कवहीगोठ, बरैनिया र गोलागञ्ज क्षेत्रबाट हरियो तरकारी, जुत्ता–चप्पल, तयारी पोसाक, लत्ताकपडा, सुर्तीजन्य सामग्री, मोटरसाइकल तथा पटाकासमेत नियन्त्रणमा लिएको हो ।
अवैध सामान ओसारपसारमा संलग्न भारतको बिहार राज्य, पूर्वी चम्पारण जिल्ला मोतिहारी का ३० वर्षीय सिकेन्द्र कुशवाहालाई समेत प्रहरीले पक्राउ गरेको छ ।
बरामद गरिएका सामान र पक्राउ परेका कुशवाहालाई आवश्यक अनुसन्धान तथा कानुनी कारबाहीका लागि वीरगन्ज भन्सार कार्यालयमा बुझाइने सशस्त्र प्रहरी नायब उपरीक्षक विक्रममणि अधिकारीले जनाएका छन् ।
सशस्त्र प्रहरीले सीमा क्षेत्रमा अवैध ओसारपसार र प्रतिबन्धित वस्तुको कारोबार रोक्न नियमित गस्ती, निगरानी र जाँच प्रक्रियालाई कडाइका साथ अघि बढाएको छ ।
