भीमफेदीमा मोटरसाइकल दुर्घटना हुँदा चालकको मृत्यु, एक जना घाईते
सिमराः मकवानपुरको भीमफेदीमा मोटरसाइकल भिरबाट खस्दा चालकको मृत्यु भएको छ । मृत्यु हुनेमा वीरगन्ज महानगरपालिका वडा नम्बर १५ लक्ष्मनवा घर भएका अन्दाजी ४० वर्षीय वृतनारायण यादव रहेको मकवानपुर प्रहरीले जनाएको छ ।
मकवानपुर प्रहरी प्रवक्ता एवं डिएसपी लक्ष्मी भण्डारीका अनुसार काठमाडौंबाट हेटौँडा आउँदै गरेको प्रदेश २–०३–०११ प ३४७४ नम्बरको मोटरसाइकल भिरबाट तल खसेको थियो । मोटरसइकलमा चालक यादवसहित बाराको फेटा गाउँपालिका वडा नम्बर ७ का ३६ वर्षीय रमेश पाण्डे सवार थिए ।
सोमबार अपराह्न भीमफेदी–कुलेखानी सडकखण्ड अन्तर्गत भीमफेदी गाउँपालिका वडा नम्बर ६ जुरिखेत ११, घुम्तीमा मोटरसाइकल भिरबाट पाँच सय मिटर तल खस्दा दुवैजना घाइते भएका थिए ।
घाइते भएका यादवको उपचारका क्रममा सोमबार साँझ हेटौँडा अस्पतालमा मृत्यु भएको प्रवक्ता भण्डारीले जानकारी दिए । यस्तै, दुर्घटनामा घाइते भएका मोटरसाइकलमा सवार पाण्डेको हेटौँडा अस्पतालमै उपचार भइरहेको छ ।
घटनाको जानकारी पाएलगत्तै इलाका प्रहरी कार्यालय भीमफेदीको टोली घटनास्थल पुगेको थियो । मोटरसाइकलबाट यादवलाई उद्धार गरी उपचारका लागि हेटौँडा अस्पताल ल्याएको थियो । मोटरसाइकलमा सवार पाण्डे भने रुखमा अड्किएका थिए ।
